محتوى المقال
أول سؤال يطلع لك وأنت تفتح متجر في سلة: أطلع سجل تجاري، ولا تكفيني وثيقة العمل الحر؟ الإجابة تعتمد على وش تبيع، وكيف تبيع، وهل تبغى توظف أو تفتح محل على أرض الواقع.
هنا مقارنة واضحة بين الاثنين، ومتى يكون كل واحد هو الخيار الصح، وكيف توثّق متجرك في سلة بأي واحد منهم.
باختصار: فتح متجر في سلة ما يشترط سجل تجاري. وثيقة العمل الحر مجانية وتكفي إذا كنت مواطن سعودي وتبيع أونلاين كفرد. السجل التجاري تحتاجه إذا بتستورد بكميات تجارية، أو تفتح محل أو مستودع، أو توظف، أو كنت مقيم.
وثيقة العمل الحر والسجل التجاري: مقارنة سريعة
| | وثيقة العمل الحر | السجل التجاري | |
|---|---|---|
| الرسوم الحكومية | مجانية بالكامل، بدون رسوم إصدار أو تجديد | رسوم إصدار سنوية + اشتراك الغرفة التجارية |
| مين يقدر يطلعها | فرد (مواطن سعودي) أو أسرة منتجة | مؤسسة فردية أو شركة، للمواطنين والمقيمين |
| التوظيف والاستقدام | لا | نعم |
| الحساب البنكي | حساب شخصي باسمك مخصص للعمل الحر | حساب تجاري باسم المنشأة فقط |
| محل أو معرض على أرض الواقع | لا، للتجارة الإلكترونية والعمل المستقل | نعم، مع رخصة بلدية |
| توثيق المتجر في سلة | معتمدة | معتمد |
| شهادة منصة الأعمال | تقدر تطلعها | تقدر تطلعها |
متى تكفيك وثيقة العمل الحر؟
- إذا بتبدأ كفرد وميزانيتك محدودة، وتبغى تقلل تكاليف البداية.
- إذا بيعك كله أونلاين، وما تحتاج محل أو معرض.
- إذا كنت من الأسر المنتجة: طبخ، مشغولات يدوية، حرف منزلية، وتبغى توسّع بيعك عن طريق الإنترنت.
- إذا كنت موظف حكومي أو في القطاع الخاص وتبغى تبيع أونلاين بشكل نظامي، ما دام ما فيه تعارض مع جهة عملك.
كيف تطلع الوثيقة؟
فيه طريقين، وكلها مجانية:
- طريق الأسر المنتجة وهو الأسرع، تقريباً خلال 10 دقائق: تسجّل في المنصة الوطنية للأسر المنتجة التابعة لبنك التنمية الاجتماعية، وتطلع شهادة أسرة منتجة عن طريق نفاذ، وبعدها تتحول تلقائياً لوثيقة عمل حر من منصة العمل الحر.
- طريق الخدمات التخصصية: تقدّم مباشرة في منصة العمل الحر، وتختار المهنة اللي تناسب نشاطك (مثل التسويق أو التصميم أو المبيعات)، وترفق مؤهل أو ما يثبت مهارتك. الاعتماد ياخذ من 24 إلى 48 ساعة.
عضوية «رائد» في منصة العمل الحر مو إجبارية، والباقة المجانية الأساسية تكفي لإصدار الوثيقة وتوثيق متجرك.
متى تحتاج سجل تجاري؟
- إذا بتستورد بضاعة بكميات تجارية عن طريق الجمارك، وتحتاج بطاقة استيراد.
- إذا بتفتح معرض أو مستودع أو محل يحتاج رخصة بلدي.
- إذا بتوظف أو تستقدم عمالة على المنشأة.
- إذا كنت مقيم غير سعودي وتبغى تمارس التجارة الإلكترونية رسمياً باسم منشأتك. الوثيقة للمواطنين فقط.
كيف توثّق متجرك في سلة بعد ما تختار؟
من صفحة توثيق المتجر في سلة:
- بوثيقة العمل الحر: تختار نوع الكيان فرد، وتدخل رقم الوثيقة السارية، والآيبان الشخصي لصاحب الوثيقة.
- بالسجل التجاري: تختار مؤسسة أو شركة، وتدخل رقم السجل الساري، والحساب البنكي التجاري المسجل باسم المنشأة.
قبل التوثيق، تأكد من هذي النقاط عشان ينقبل طلبك من أول مرة:
- اسم صاحب الحساب البنكي لازم يطابق الاسم في شهادة الآيبان والهوية. حساب باسم شخص ثاني يُرفض.
- الوثيقة لازم تكون سارية. لو منتهية يتوقف الطلب.
- المهنة في الوثيقة لازم تناسب المنتجات اللي تبيعها، وإلا ممكن يُرفض الطلب.
- ارفع صورة واضحة لشهادة الآيبان الرقمية من تطبيق البنك.
بعد ما ينقبل التوثيق تتفعّل لك بوابات الدفع (مدى، فيزا، Apple Pay، والدفع الآجل) وخدمات الشحن.
وبعدها؟ توثيق منصة الأعمال
توثيق متجرك داخل سلة يختلف عن التوثيق الحكومي. وش ما كان اختيارك، تقدر تطلع شهادة توثيق التجارة الإلكترونية من منصة الأعمال مجاناً، ووزارة التجارة تدعو المتاجر لها، وتحط رمزها في فوتر متجرك. وانتبه إن منصة الأعمال تشترط حساب بنكي تجاري. شرحنا خطواتها بالتفصيل في توثيق المتجر في منصة الأعمال.
أسئلة تتكرر
بديت بوثيقة عمل حر، هل أقدر أتحول لسجل تجاري بعدين؟ إيه، تحدّث بيانات الكيان والحساب البنكي في سلة، بدون ما تقفل متجرك.
محتار وش يناسبني؟ سلة عندها أداة اسمها مستشار التوثيق تساعدك تحدد الخيار الأنسب لوضعك.
المعلومات هنا مأخوذة من مركز مساعدة سلة وقت كتابة المقال، والأنظمة والرسوم الحكومية ممكن تتغير. تأكد دائماً من الجهة الرسمية قبل ما تقدّم، وهذا المقال للتوضيح وليس استشارة قانونية.
نطلعها لك
نجهز طلب وثيقة العمل الحر ونختار المهنة المناسبة لنشاطك، ونتابع الطلب معك:
أو نطلع لك سجل تجاري إلكتروني ونتابع الطلب لين الإصدار:
أسئلة شائعة
هل لازم سجل تجاري عشان أفتح متجر في سلة؟
لا، تقدر تبدأ وتوثّق متجرك بوثيقة العمل الحر المجانية بدون سجل تجاري.
هل المقيم يقدر يفتح متجر بوثيقة العمل الحر؟
لا، وثيقة العمل الحر للمواطنين السعوديين فقط. المقيم يفتح متجره عن طريق مؤسسة أو شركة وسجل تجاري.
هل أقدر أتحول من وثيقة العمل الحر لسجل تجاري بعدين؟
إيه، تحدّث بيانات الكيان والحساب البنكي في سلة بدون ما تقفل المتجر.
هل الموظف الحكومي يقدر يطلع وثيقة العمل الحر؟
إيه، موظفين القطاع الحكومي والخاص يقدرون يطلعون الوثيقة ويوثّقون متاجرهم بشكل نظامي، ما دام ما فيه تعارض مع جهة العمل.